Инцидентите кои на крајот на минатата и на оваа туристичка сезона се случија во Охрид се изолирани случаи и тие никако не смеат да бидат репер за безбедносната состојба во најголемииот туристички центар во Македонија, беше истакнато на Меѓународна конференција „Охридски денови на гостопримството и туризмот во регионот на Југоисточна Европа“, што денеска започна во хотелот „Инекс Горица“ во Охрид.

– Ова советување, оваа манифестацијата, треба да покаже дека немилите настани што секаде се случуваат, се исклучоци, а Охрид е исклучителен град каде традиционално е присатно гостопримството. Ние како дел од науката, стопанствениците токму затоа сме тука, за да помогнеме да се надмине оваа ситуација, истакна деканот на Факултетот за туризам и угостителство од Охрид, Сашо Коруноски.

Според Драган Глигориевиќ, претедател на Меѓународниот центар за развој на туризмот и угостителството (Sacen Internacional) Охрид е светска туристичка дестинација која недоволно се промовира. Тој укажува дека Охрид, како и Македонија и другите земји во регионот прават голема грешка што своите туристички потенцијали ги нудат само во земјите од опкружувањето. Со тоа, смета Глигоријевиќ, им се дава предност на останатите региони кои со заедничка и добро осмислена понуда го освојуваат светскиот пазар.

– Иако овој регион е мошне богат со вонредни човечки и природни потенцијали, туристите не одминуваат оттаму што гостите сакат во што покус рок да видат што повеќе. Охрид и регионот хронично прават грешки и ја пропуштаат можноста добро да се позиционираат односно добро да ги претстават своите потенцијали, затоа што не се слушаат барањата на туристите. Туризмот е настан, приказна, авантура, доживување, тоа се елементите што треба години однапред да се осмислат, рече Глигориевиќ.
 
Тој укажува дека Охрид на светскиот пазар треба да се позиционира како Дубровник кој има имиџ на скапоцен камен во светската туристичка понуда и изрази надеж дека од собирот на туристичките работници во Охрид ќе произлезат позитивни идеи за заеднички настап на регионот во 2011 година.

– Бог многу повеќе дал тука отколку што е тоа искористено. Голема штета би било доколку Охрид би останал непознат пред туристичкото движење. Охрид е хит-дестинација, бидете сигурни дека одовде пораката ќе биде пренесена дека тој е бисер на светскиот туризам, додаде Глигоријевиќ.


Меѓународната конференција за туризам во Охрид е во организација на Меѓународната Организација – Sacen Internacional- центар за развој на туризмот и угостителтвото, во соработка со претпријатието „Филип“ ДООЕЛ, како и Општина Охрид.  Учествуваат шеесетина научни и туристички работиници  од земјите во регионот кои на тридневниот собир во Охрид ќе разменат мислења за  културниот, верскиот, конгресниот и другите видови туризам како и за гастрономската понуда.

Г.М.