Извршниот одбор на СДСМ на синоќа одржаниот состанок донел одлука да не се прифатат мандатите во Собранието и да не се поднесуваат приговори до ДИК во врска со одржаните избори. Образложението од СДСМ е дека не гледаат причина зошто би се доставувале приговори до ДИК, како што велат , кога не функционираат институциите. Додаваат дека во текот на целиот изборен период и предизборието биле поднесени над 100 претставки од нивна страна кои не биле прифатени, а некои од нив не биле ниту разгледани.
Предлогот на извршниот одбор ќе биде доставен до централниот одбор на партијата кој ќе заседава вечерва во 18 часот и кој треба да се изјасни дали го прифаќа предлогот за одбивање на мандатите.
Одлуката на Социјалдеморкатскиот сојуз да ги врати пратеничките мандати е штетна за партијата, но и за целата држава, изјави лидерот на ВМРО-ДПМНЕ и премиер на Република Македонија, Никола Груевски, одговарајќи на новинарско прашање за актуелните случувања на политичката сцена.
Груевски додаде дека СДСМ се уште има време да ја преиспита својата одлука додека Парламентот не почне со работа.
Централниот одбор на опозициската партија треба да се одржи вечерва после 18 часот, кога и дефинитивно ќе се знае дали СДСМ ќе ги прифати или не пратеничките мандати.
Т.К.
