Македонската влада има усвоено посебна Стратегија за Итна медицинска помош, со која е предвидено да се набават 80 нови возила за потребите на итните служби на ниво на целата држава. Овие возила се очекува да бидат набавени следната година, вели за OhridNews потпаролот на министерството за здравство, Анета Ангеловска.
– Во меѓувреме, службите на Итната помош се должни да обезбедат соодветен и навремен технички преглед, сервисирање и соодветно да се грижат и да ги одржуваат возилата што ги имаат за да бидат во исправна состојба. Самите ЈЗУ, исто така, можат да набават нови возила и со сопствени средства, доколку во буџетот и во планот за јавни набавки има планирано набавка за тоа возило, нагласува Ангеловска.
ЈЗУ Здравствен дом располага со возила кои се стари неколку децении и постојано се расипувааат. Како што неодамна изјави директорот на оваа здравствена установа, Митко Дабески, возилата постојано се поправаат, а испратено е и барање до министерството за здравство за доделување на минимум две нови возила за потребите на итната служба.
Т. К.
