Претседателот на Република Македонија, на денешната средба во неговиот кабинет со генералните секретари на ВМРО-ДПМНЕ, Кирил Божиновски и на СДСМ, Андреј Петров, околу формирањето на ад-хок комисијата за расветлување на настаните кои се случија и кои претходеа на 24 декември 2012 година, за претседател на комисијата го предложил претседателот на Македонската академија на науките и уметностите, академик проф. д-р Владо Камбовски, како угледен и авторитетен универзитетски професор по кривично право.
-Ги повикуваме двете партии да се изјаснат по овој предлог на претседателот Иванов, со цел формирање на ад-хок комисијата и што поскоро започнување со нејзината работа, со крајна цел исполнување на постигнатиот политички договор од 1-ви март и целосно фокусирање кон евро-атлантските интеграции на Република Македонија, во пресрет на одржувањето на состанокот на Европскиот совет, стои во соопштението од Кабинетот на претседателот Иванов.
Јавното соопштување на предлогот на претседателот Иванов следува по низата претходно одржани средби и неуспешни обиди за постигнување консензус за избор на претседател на комисијата.
