Безбедносните структури во Македонија добро си ја работат работата и затоа нема потреба од свикување на Советот за безбедност на државата.

Ова го изјави претседателот Ѓорге Иванов на денешната неформална средба со лидерите на политичките партии во Катланово.

Иванов, коментирајќи ги последните заплени на поголемо количество оружје кај Блаце и Радуша, рече дека некои структури упорно се обидуваат да го прекршат законот и за нив ќе следат соодветни санкции.

На лидерската средба присуствуваа Никола Груевски, Али Ахмети и Бранко Црвенковски, додека Имер Селмани и Мендух Тачи, иако поканети, не дојдоа.

Освен за безбедносната ситуација во земјата, на неформалната средба станало збор и за состојбата во регионот, прашањето за човековите права, малцинските права, како и за интересите на политичките партии.

Иванов истакна дека ваквите средби се корисни за продолжување на политичкиот дијалог во земјата.

OhridNews
извор: „Макфакс“