Графитите со навредлива содржина на национална основа што осамнаа деновиве, цртањето кукасти крстови и сквернавењето на сакралните објекти во Охрид, не ги вознемири властите, политичките партии и невладините организации во градот. Никој од нив не излезе со реакција и не ги осуди вандалските инциденти кои го нарушуваат спокојството на охриѓани и го загрозуваат вековниот соживот.
Изминатава недела речиси да немаше ден, а да не стигне до локалните медиуми некакво соопштение, реакција, демант или најава за прес конференција на „актуелна тема“ од политичките субјекти, здруженија, институции… Но истите тие сега молчат, со што испраќаат лоша порака до јавноста.
Единствената реакција пристигна од здружението на Египќаните ОПЕМ и невладината „Светла иднина“. Според нив ваквите инциденти се обид да се испровоцираат традиционално добрите и коректни меѓуетнички и меѓучовечки односи во Охрид. Преставниците на Египќаните повикуваат нивните сограѓани Македонци, Албанци, Турци, Црногорци, Срби и други, да не подлегнуваат на ваквите провокации, кои според нив, имаат за цел да се наруши соживотот во градот.
Охрид е град на културата и духовноста, дел од светското културно наследство и не му доликуваат вакви инциденти. Затоа надлежните институции, пред се полицијата, треба брзо и енергични да реагираат, да ги откријат сторителите и нарачателите и да ги изведат пред лицето на правдата, а охриѓани да соберат храброст, да ги засукаат ракавите и да ги избришат непристојните пораки и симболи од ѕидовите на верските објекти, училиштата и споменици на културата, кои претставуваат вистински срам за едно цивилизирано општество.
