Законот за престанување на важење на Законот за попис на населението, домаќинствата и становите во Република Македонија синоќа беше усвоен од мнозинството пратеници во Собранието на Република Македонија.
Непосредно пред гласањето опозицијата ја напушти собраниската седница.
Како што објасни министерот за правда Блерим Беџети, причина за донесување на овој закон се недоследности и недоречености во примената од одредби од Законот за попис како резултат на недоволниот временски период за подготовка и обучување на учесниците во спроведување на пописот во земјата, а посебно на реонските инструктори и попишувачи.
Беџети посочи дека пописниот материјал собран за време на спроведувањето на пописот ќе биде уништен од страна на Државниот завод за статистика, кој ќе ги сноси направените трошоци за пописот.
Пописот на населението, домаќинствата и становите почна на 1 октомври, а беше прекинат четири дена пред законскиот рок за спроведување откако членовите на Државната пописна комисија поднесоа колективна оставка.
OhridNews
