„Изрази се преку медиумите“ е името на конкурсот, преку кој Високата школа за новинарство и за односи со јавноста ќе додели стипендии, на 10 матуранти од Република Македонија.
Според условите на конкурсот, кој ќе трае до 22 април, матурантите треба да подготват едноминутен видео клип, текст или фотографија на тема „Заедно за училишта без насилство“.
-Медиумскиот производ треба да прикаже примери за тоа што се презема за да имаме училиште без насилство или да предложи начин како да се спречи насилството меѓу средношколците во и надвор од училиштата. Производот треба да покаже дека сите членови на заедницата – ученици, професори, родители и институции, треба да работат заедно за да се создаде сеопфатен училишен пристап за решавање на проблемот со насилството меѓу средношколците, стои во објавата на конкурсот.
Целта на овој проект е да ги стимулира средношколците да ги искажат своите гледишта за надминување на насилството во училиштата.
– Сметаме дека проектот ќе ги стимулира средношколците, преку изработка на медиумски производи, да ги искажат своите гледишта за надминување на насилството во и надвор од училиштата, со што самите активно ќе се вклучат во процесот на промена на однесувањето во насока на зголемување на толеранцијата, избегнуавњето на насилството во решавање на конфликтните ситуации и создавањето позитивна и сигурна училишна средина, рече министерот за образование и наука Панче Кралев, на промоцијата на проектот.
Конкурост „Изрази се преку медиумите“ го реализира Високата школа за новинарство и за односи со јавноста во соработка со Министерството за образование и наука, Јавното сообраќајно претпријатие – Скопје и Канцеларијата на УНИЦЕФ во Скопје, а со поодршка на медиуми, компании и организации.
