Министерството за труд и социјална политика, односно Државниот инспкеторат за труд вчера и завчера изрече 25 решенија за забрана за вршење дејност на фирми што не ги почитуваа препораките да не ангажираат работници на терен во период кога се највисоки температурите и е најголемо зрачењето.
Министерот за труд и социјална политика Спиро Ристовски, информираше дека веќе од денеска ќе следи и објава на имињата на фирмите за кои инспекцијата ќе утврди дека не ги почитувале препораките за неизложување на работниците од 11 до 17 часот и казни согласно со Законот за безбедност и здравје при работа.
,,Со оглед на зголемувањето на температурите и зрачењето вчера издадовме последна опомена, но тоа не значи дена никој не е казнет. Во текот на вчерашниот и завчерашниот ден се изречени 25 забрани за вршење дејност. Инспекторите на трудовата инспекција се веќе на терен. Апсолутно опстојуваме на она што го соопштивме вчера. Ќе нема никакви толеранции и сите буквално ќе бидат идентично третирани, без оглед кој и да е работодавач, ќе бидат изрекувани забрани за вршење дејност, а од друга страна ќе се изрекуваат и веќе се изрекуваат соодветни казни, рече министерот Ристовски.
Според него, доколку во текот на денов се утврди дека фирмите на коишто вчера им е изречена забрана ќе ја почитуваат ќе бидат казнети согласно со Законот за безбедност и здравје при работа.
,,Станува збор за исклучително тешки временски услови и нема логика кој било да биде толериран да извршува работни задачи во периодот од 11 до 17 часот. Ја разбирам потребата и на граѓаните да добијат нови улици и крстосници, меѓутоа треба да се има предвид дека елементарно човеково право е на секој работник да му се обезбедат нормални услови за работа. Моментно во надворешни услови нема елементарни услови за работа во период од 11 до 17 часот и ќе продолжиме да го спроведуваме законот без разлика кој е работодавачот и на каков проект се работи, нагласи министерот за труд и социјална политика.
OhridNews
