Јапонија денеска побара американска помош за решавање на кризата со нуклеарната централа Фукушима 1, чии реактори се опасно прегреани откако разорното цунами пред една недела го исфрли од контрола системот за ладење, пренесува „Макфакс“.
Истовремено, шефот на агенцијата на Обединетите нации за нуклеарна енергија ги предупреди јапонските власти дека во Фукушима 1 водат трка со времето за да ја запрат катастрофата и укажа на тоа дека за успех на оваа трка е потребна глобална соработка.
Воените противпожарни возила утрово се вклучија во полевањето на реакторот број 3 со вода, за да се спречи топлење на нуклеарното гориво во него, а со самото тоа и ослободување на радијацијата.
Подготвена е и една противпожарна кола на американската војска, рече неименуван службеник на јапонската војска и додаде дека ако возилото се активира, тогаш ќе го управуваат јапонски работници.
Инаку утрово од вториот блок на нуклеарната централа Фукушима 1 се извива чад, кој засега не се знае од што е предизвикан.
Се верува дека во овој блок нивото на водата за ладење на шипките на реакторот е екстремно ниско и дека постои опасност од нивно топење, а со тоа и до големо ослободување на радијација.
Регуларниот систем за разладување се исклучи во петокот по ударот на Цунами на централата, а од тогаш во четири од шест нуклеарни реактори на Фукушима 1 избувнуваа пожари, доаѓаше до експлозии на акумулиран водород и до пораст на нивото на радијација над дозволеното.
Се очекува до недела да се вклучи струјата во реакторите три и четири, но и тоа не е гаранција дека електричните пумпи ќе проработат, бидејќи можеби се оштетени по земјотресот, цунамито и експлозиите, јавува Би-Би-Си.
Шефот на американската регулаторна комисија за нуклеарна енергија Грегори Јацко процени дека за ладење на реакторите и враќање на Фукушима 1 под контрола, „можеби ќе бидат потребни недели
извор: „Макфакс“
