Јонуз во Малта ги реди коцките за Словачка

Македонската фудбалска репрезентација која на 11. Август во Ла Валета го игра последниот контролен натпревар пред стартот на квалификациите за ЕП, од денеска го започнува собирот во главниот град на оваа мала островска земја .

Селекторот Јонуз очекува уште една добра проверка и продолжување на успешната серија на резултати:

– Овој натпревар за нас е важен пред се од психолошки аспект, и без разлика на силата на противникот очекувам добар тест в среда навечер. Собирот е исто така важен затоа што е последен пред почеток на квалификациите за ЕУРО 2012, и ќе се потрудиме да ја одржиме добрата атмосфера која владее во тимот за да го пречекаме натпреварот во Словачка со позитивен импулс. Нема да менуваме ништо во концепција на играта и како до сега така и во среда ќе играме за да победиме. Списокот што беше објавен минатата недела има само една промена. Поради реализација на трансфер и нов договор со една европска екипа, од обврските го ослободивме стандардниот играч од средниот ред, Величе Шумуликоски. На неговото место е повикан играч од домашното првенство, Никола Глигоров од ФК Работнички, кој настапуваше во младата репрезентација кога јас бев селектор – истакна Јонуз.