Потребно е воведување на технички стандардизирани листи како документ според кој со одредени нормативи се изведуваат рецептите во кујните и доколку сетоа тоа се прати како процедура од почеток до крај се добива еден навистина стандарден, високо квалитетен производ во кујната, којшто никогаш неможе да биде импровизиран. Секогаш и првиот и последниот производ којшто ќе биде зготвен во самата кујна, ќе има ист вкус, ќе се карактеризира со стандарден квалитет, ќе биде ист во поглед на квантитет, грамажа, прилози, аранжирање. Од минатата година направив напори сето ова да се имплементира во делот на гастрономијата, односно во делот на Хотелско- ресторанската насока и насока Tуризам каде студентите имаат изборна насока на факулететот вели Климент Наумов, доцент на Факултетот за туризам и угостителство во Охрид во областа на гастрономијата.

Било која кујна пред се нашата македонска, па и балканската, правиме напори, сите тие убави рецепти по кои сме препознатливи да бидат стандардизирани и да бидат официјални документи. Обидувајќи се нашата традиционална кујна да ја спакуваме на еден помодерен начин, да не одиме на квантитет, туку клиентот да биде задоволен на еден квалитетен начин, а при тоа да бидат запазени и тие нормативи, вели Наумов. 

Исто е и со начините на послужување. Нашите студенти се запознаваат веќе со различни начини на послужување на храна, француски, капитан сервис, американскиот начин на послужување, кој, всушност, се практикува тука со одредени измени, додава Наумов.

Со оглед дека се соочуваме со огромен одлив на работна сила, квалитетните угостителски работници веќе одамна се заминати во Хрватска и Европа, бидејќи таму каде што има потреба и се плаќа подобро ваквата услуга. Би требало да се апелира и час поскоро нашите менаџери во рестораните и сопствениците на угостителските објекти да размислат да инвестираат во човечките ресурси, да ги мотивираат своите вработени, истакна Наумов.

Пратењето на одредена дисциплина, правила, навремена и соодветна комуникација со клиентите може да ја подобри сегашната ситуација во угостителството, а пред се мора да се фокусираме на целовремено обучување на човечките ресурси кои се во првите редови на сервисот, односно испорака на услуги во угостителството, додава Наумов.

Н.С.Ј.