„Каратанова – турс“ во соработка со „Мат Ервејс“ вчера го реализираше првиот чартер лет од Скопје за Амстердам со најава дека иста таква линија од 1-ви јули ќе биде воведена и кон Охрид. Овој чартер лет ќе се реализира секој петок од април до октомври, а целта е како што најавуваат организаторите да се воспостави директна авио линија од Холандија за Македонија.
Предвидено е холандските гости кои во Охрид ќе допатуваат преку „Каратанова – турс“ да престојуваат во 7 и 14-дневни аранжмани. Тие ќе бидат сместени во 8 хотели на охридско-струшката ривиера, а дел ќе престојуваат во познати вили во центарот на градот.
Покрај овој, за претстојната туристичка сезона најавени се уште два чартер лета неделно од Холандија за Охрид. Туристичките работници се задоволни од најавите и склучените аранжмани и очекуваат оваа сезона на охридско-струшката ривиера да престојуваат околу 10.000 туристи од Холандија.
OhridNews
