На пригодна свеченост што ќе се одржи во четврток, 6-ти април во организација на Лајонс клубот Лихнидос, ќе биде одбележана 100 – годишнината од првата електрична светилка во Охрид. По тој повод на светилка кај градското пристаниште ќе биде откриена спомен плоча.
На свеченоста најавено ее присуство на амбасадорката на Австрија во Република Македонија Ренате Коблер и на претседателот на Управниот одбор на ЕВН Македонија Штефан Петер, на претставници на локалната самоуправа и други официјални лица и гости.
На свеченоста ќе има краток историски осврт за поставувањето на првата електрична светилка во Охрид од страна на Австриската војска.
– Во Историскиот архив во Охрид, барајќи стари фотографии за пригодна изложба по повод 8-ми Декември (Св. Климент, Патрон на градот), наидов на податок дека пред точно 100 години, 1916 година на градското пристаниште е подигнат првиот електричен фенер во Охрид, од страна на Австриската војска за што постои и фотографија. Тоа го инспирираше Лајонс клубот Лихнидос кој покрена иницијатива на истото место да се подигне фенер и адекватно да се означи со пригодна плоча на македонски и германски јазик. – вели проф. д-р Зоран Тунтев, член на ЛК Лихнидос.
Воедно на 6-ти април ЛК Лихнидос ќе го одбележи осмиот роденден со хуманитарен настан за поддршка на Здружението на слепи лица од Охрид.
OhridNews
