Цената на лебот веќе поскапе за еден денар кај некои од производителите. Наредниот период се очекува и поскапување на брашното кое ќе повлече поскапување на лебот кај сите производители, објавија неколку нацинални медиуми. За да биде скокот на цената помал, мелничарите бараат намалување на екстра давачките при увоз на пченица.
-Реално може да се очекува повисока цена на брашното поради неколку фактори. Македонија има домашна пченица, но освен во битолскиот регион, не е квалитетна. За да добиеме добро брашно, треба да ја мешаме со увозна, а контролите на увоз (лабораториските испитувања) ја зголемуваат цената за 1 денар по килограм пченица. И бидејќи и во регионот има недостиг на добра пченица, цената скока. Кога се ќе се собере, ќе се одрази врз цената на домашното брашно, вели Николчо Ѓорѓиев, претседател на групацијата на мелничко-пекарската индустрија во Стопанската комора на Македонија.
Мелничарите доставиле барање за средба со ресорниот министер за земјоделство.
-Чекаме да ни закажат термин. Треба да го информираме за состојбите и да побараме решение за давачките на увоз на пченица, да се вратат на старото решение. Кога се воведуваше контролниот механизам, заложбата беше да се зголеми контролата на увозното брашно, а не толку на пченицата, сега во пракса е обратно, вели Ѓорѓиев.
Сегашната цена на брашното за тип 500 е меѓу 17 и 20 денари, а за тип 400 од 24 до 27 денари.
OhridNews
