Агенцијата за финансиска поддршка во земјоделството и руралниот развој денеска објави јавен повик за доставување барања за користење на средства од Програмата за финансиска поддршка на руралниот развој за 2016 година, за мерката за економско здружување на земјоделски стопанства за заедничко вршење дејност и финансиска поддршка за основање и функционирање на земјоделските задруги.
Како што соопшти Агенцијата, финансиската поддршка што ќе биде доделена е неповратна, а средствата се предвидени за основање и функционирање на земјоделски задруги регистрирани во Регистарот на земјоделски задруги при Министерството за земјоделство, шумарство и водостопанство.
Со парите ќе се покриваат дел од трошоците за основање на земјоделска задруга, воспоставување на административни и технички капацитети, помош за ангажирање на стручни лица, плата за лице управител на земјоделска задруга, за ангажирање на едно лице од областа на земјоделските науки и ветерината и помош за премии за осигурување во вид на надоместок на дел од трошоците за осигурување.
Поддршката за оваа мерка се исплаќа квартално по доставено барање за исплата и тоа за прв квартал најдоцна до 15 април 2016 година, за втор квартал најдоцна до 15 јули 2016 година, за трет квартал најдоцна до 15 октомври 2016 година и за четврт квартал најдоцна до 31 декември 2016 година.
OhridNews
