Со цел да се стимулира и помогне уметничкото творештво на самостојните уметници, Министерството за култура за 2015 година ќе обезбеди средства од Буџетот на Република Македонија, како месечни надоместоци на самостојните уметници, за придонесите за здравствено, пензиско и инвалидско осигурување и за персоналниот данок на доход.
За таа цел министерството распиша конкурс за доделување месечни надоместоци кој ќе биде отворен до 20-ти октомври 2014 година. Право за учество на овој конкурс ќе има секој уметник кој е регистриран во Централниот регистар на Република Македонија како трговец-поединец самостоен уметник за вршење уметничка дејност, во согласност со Законот за културата и Законот за трговските друштва.
Според условите на конкурсот уметникот треба да ги исполнува основните и дополнителните критериуми по одделни видови уметничко творештво утврдени во Правилникот за утврдување на критериумите, постапката и начинот на обезбедување поволни услови и надоместоци од средствата на републичкиот буџет на самостојните уметници. Пријавувањето на конкурсот се врши со доставување пополнета пријава која е објавена на веб-локацијата на Министерството за култура.
Со самостојните уметници кои ќе добијат средства од овој конкурс, Министерството за култура ќе склучи поединечни договори во коишто ќе се утврдат условите и обврските на самостојните уметници за користење месечен паричен надоместок.
OhridNews
