Ќе се уредуваат терасите на избрани куќи во центарот на градот

По избор на ЈП „Охридски комуналец“, неколку куќи кои се истакнуваат по својата убавина во централното градско подрачје ќе бидат уредени со цвеќиња од јавното претпријатие.

– Ќе се избираат куќи кои се изградени во стар охридски стил, кои го привлекуваат вниманието со својата убавина и се наоѓаат на улици кои се фреквентни и најпосетувани од страна на туристите. Со наше цвеќе ќе се уредуваат и разубавуваат нивните дворови и балкони, вели Трајан Љаткоски, раководител на Паркови и зеленило.

За оваа цел од јавното претпријатие се издвоени 300 жардиниери и поголем број саксии со сезонско цвеќе. Акцијата е во рамки на проектот „Охрид- град на цвеќето 2012“.

Од страна на претпријатието за оваа летна сезона произведени се вкупно 33000 садници со кои ќе се уредуваат цветните леи во градот и хортикултурните катчиња.