Силните дождови и топлотните бранови предизвикани со климатските промени, може да го загрозат доставувањето на храната од полињата до супермаркетите, со опасност од голем скок на цените на прехранбените артикли, како што годинава се случува во САД, предупредуваат научниците.
Обединетите нации затоа предупредуваат дека би требало да се посвети повеќе внимание во која мера екстремните суши, горештините и поплавите може да влијаат врз количеството произведена храна, од посеаното семе до чиниите на потрошувачите.
„Тука не станува збор само за фактот дека поради сушата приносите во САД ќе бидат помали“, вели професорот Џин Портер од универзитетот во Копенхаген. Тој предупредува дека поплавите, на пример, не ја уништуваат само жетвата, туку со себе носат и уништување на патиштата и мостовите, а складиштата на житарките сѐ почесто се на мета на силните бури. Тие фактори, вели Портер, најверојатно најмногу ќе ги погодат и онака сиромашните земји.
„Можеме да очекуваме раст на цените на храната, бидејќи сѐ почесто ќе бидеме сведоци на екстремните услови“, истакнува Дејвид Лонел од универзитетот Станфорд во Клифорнија.
Најлошата суша во последните пет децении во САД е „виновникот“ за растот на цените на пченката за повеќе од 50 отсто. Сувото и жешко време, исто така, ги погоди и посевите во јужна Европа. Еден од најголемите проблеми коишто го предизвикуваат екстремните временски услови е и проблемот со дистрибуцијата на храната.
„Во светот има доволно храна, меѓутоа проблемот е во дистрибуцијата“, смета професорот Брус Меккари од универзитетот во Тексас, кој, исто така, стравува дека екстремните временски прилики ќе придонесат за натамошен раст на цените на храната.
OhridNews
ивор:„Макфакс“
