Коалицијата на младински организации СЕГА строго го осудува инцидентот во Тетово, каде пред два дена средношколец уби средношколец и смета дека институциите на системот треба да поведат поголема одговорност кон младата популација, во спречувањето на девијантното однесување, особено кога станува збор за носење на оружје од страна на средношколци, ученици, малолетници. Казните за носење на оружје да бидат поригорозни, особено кога оружјето (огнено или ладно) се најде во рацете на средношколци.
Без оглед што и да е причината и поводот за убиството на еден млад човек, ставот на Коалицијата СЕГА е дека ваквите постапки на млади луѓе треба строго да се осудат, неопходно е постојното воспитување на младите, а пред се поодговорно однесување на семејството (како институција), кое денес во трката за егзистенција врши запоставување на традиционалните вредности и воспитување на младите.
Според истражувањето на Коалицијата СЕГА направено меѓу 1040 млади во 14 градови од Македонија (минатата година) лошата економска состојба и негрижата на општеството најмногу влијаат на ширењето на девијантните појави (тврдат 33% од испитаниците).
Според 45% од испитаниците неопходно е да се врши континуирана едукација на младите за штетноста и последиците од девијантните појави, меѓу кои и насилството со оружје. Исто така 39% од младите сметаат дека грижата на семејството е многу битен елемент за намалување на ширењето на девијантните појави. Според тоа, сметаме дека треба да се продолжи со континуирана едукација на младите луѓе преку образовните институции со цел превенција и намалување на насилство; да се заложат институциите кои се надлежни (како училишта, ЦСР, НВОи, МВР) да преземаат континуирани активности за спречување и намалување на насилствата како и да се зајакне теренската (директната) работа со млади во насока на намалување на девијантните појави и да се зголемат кампањите за забрана за носење на оружје кај малолетниците, посочуваат од СЕГА.
Коалицијата СЕГА во 2010 и 2011 година го имплементира проектот за меѓукултурна толеранција и соработка помеѓу младите луѓе, насловен како „Промовирање на меѓукултурниот дијалог помеѓу младите во Македонија“. Проектот говори како младите треба меѓусебно да се почитуваат, како да бидат пријатели, зошто е потребно младите да комуницираат и да се дружат, за меѓусебно разбирање и соживот, без насилство и агресија.
Во тој контекст, Коалиција на младински организации СЕГА под итно бара активно вклучување на младите во заедницата и конструктивно користење на слободното време со цел да се минимизираат ваквите девијантни појави.
