Кој е виновен?

Кој е виновен за состојбата на младите беше главното прашање околу кое  дискутираа младите од Охрид на тринаесеттата јавна дебата од циклусот Република Млади, што се одржа вчера. Младите претставници од невладините организации и политичките партии дебатираа дали вината за пасивизмот лежи исклучиво кај младината или пак токму системот, државата и институциите се оние кои намерно ги “држат” младите под контрола. 

Заеднички е ставот дека младите треба да бараат повеќе да бидат гласни и артикулирани во своите ставови, а во исто време државата да овозможи канали и процедури со кои ќе го вреднува младинскиот активизам и ќе овозможи учество на младите во одлучувањето.

Системот на студентско и средношколско организирање беше посочен како типичен пример на ставање рака врз младинските акции од страна на државата и партиите, а беше потенцирана и потребата од формирање на Национален младински парламент како највисоко претставничко тело на младите.

Претставниците на политичките партии и организациите беа едногласни во констатацијата дека Предлог-законот за младите не беше изработен транспарентно и не содржеше решенија кои се во интерес на младите и го поздравија неговото повлекување од собраниска процедура.

Активизмот и организирањето на локално ниво мора да продолжи и да се интензивира, за што се потребни директни активности во рамките на училиштата и факултетите. Образовниот систем не гради активни и креативни граѓани, за што е потребна итна реакција од страна на одговорните институции, беше заклучено на дебатата.