Колекторскиот систем за преработка на отпадни води, најитно треба да се доизгради и да ги опфати сите населени места на крајбрежјето на Охридското Езеро, кое и натаму се загадува со фекални и други непречистени води кои со себе ги носат реките кои се влеваат во него. Експертите предупредуваат дека вака како што работи, колекторскиот систем е нефункционален, што може да има несогледливи последиците по животната средина бидејќи и покрај огромната моќ за самопречистување која ја поседува, веќе се забележуваат одредени промени во екосистемот на Охридското Езеро.

-Се поставува прашање дали воопшто треба да постои Колекторот доколку тој загадува. Треба да се преземат мерки пред се за механичко докомплетирање, негова доиздрадба и зголемување на капацитетот на прифаќање на водите затоа што се случува после дождови да има мешање на вода и излевање на вода од шахти и пумпни станици, истакна Ленче Локоска од Хидробиолошкиот институт од Охрид.

Од МЈП „Проаква“ кое стопанисува со Колекторот тврдат дека системот за пречистување на отпадните води е во одлична кондиција и без проблем ги прифаќа и преработува проектираните количини фекални води. Според одговорните проблем создава дождовната вода која го оптоварува системот особено при обилни врнежи поради што доаѓа до излевање на непречистени води во езерото.

– Перманентно езерото се загадува со одредена количина разредена фекална вода со дождовна вода. Поточно онаму каде што системот не ги поднесува тие количини води има мешање и излевање на вода и точно се знае на кои места, тоа се Грашница и пумпната станица кај Подмоље.-вели Ваит Ајро од МЈП „Проаква“ – Струга“.

Ајро посочува дека загадувањето на Охридското Езеро не може да се спречи без да се реши проблемот со атмосферските води во Охрид, кои покрај тоа што редовно предизвикуваат поплави во одделни населени места, го загрозуваат и работењето на колекторскиот систем, кој е проектиран за прифаќање и пречистување фекални, а не дождовни води.

-Дождовната вода не треба да влегува во колекторскиот систем. Дождовната од фекалната вода мора да се одвои, за што е потребно да се изгради систем за прифаќање на атмосферските води во должина од околу 25 километри според едни, односно 50 километри според други проценки, но тоа мора да се направи за да се реши проблемот еднаш засекогаш, бидејќи сега во колекторот влегува 7 пати повеќе атмосферска од фекална вода.-предупредува Ајро.

Со проблемот околу заштитата на Охридското Езеро деновиве беа запознаени претставниците на КФВ банката од Франкфурт која е еден од најголемите донатори и кредитори на проекти за заштита на Охридското Езеро и за подобрување на водоснабдителниот систем во Охрид и Струга,  проект кој го пратат сериозни пропусти и афери поради што локалните самоуправи на Охрид и Струга покренаа иницијатива за раздружување на  МЈП „Проаква“ кое заеднички го формираа.

Горан Момироски