„Честитки, добивте вредна награда, наследство, бесплатно патување“ – ова се само дел од пораките кои граѓаните секојдневно ги добиваат на нивната електронска пошта од непознат испраќач. Единствено што се бара од нив е само да ги остават личните податоци и бројот на сметката за да им бидат префрлени наводно добиените средства. Оние кои ќе го сторат тоа, не само што ќе останат без ветената награда, туку и без своите пари, кои ќе завршат во џебовите на вештите компјутерски криминалци, предупредуваат експертите. Тие укажуваат дека комјутерските измами се во пораст во целиот свет, а имуна не е ниту Македонија, каде најмногу злоупотреби има на платежни картички.
-Ефикасна заштита нема, секој треба да си внимава какви податоци оставаме, и какви плаќања вршиме, некој може да ги злоупотреби, а ќе најдете на некоја од страниците дека се продаваат и броеви од кредитни картички, изјави доц. Светлана Николовска, од Факултетот за безбедност во Скопје.
Според доц. Николовска кај нас не се зборува многу и за моралната безбедност, посочувајќи дека јавноста малку е свесна на опасностите од злоупотреба на личните податоци кои ги оставаме на социјалните мрежи.
-Млади деца ставаат фотографии на Фејсбук, но не знаат дека тие фотографии од некого може да бидат симнати обработени во фотошоп и употребени за порнографски материјал. Треба повеќе да се зборува за тоа, а и преку медиумите да се организираат дебати и да им се укаже на опасноста на граѓаните, кои не се свесни за тоа и мислат дека такви работи му се случуваат на некој друг, додава Николовска.
Професорката Николовска предупредува дека се поголем е бројот на лица, најчесто омлади, кои сакајќи брзо да стекнат богатство влегуваат во водите на комјутерскиот криминал, поради што е потребно и државата да ги надгради своите одбрамбени капацитети, а специлајизираните служби постојано да ги следат светските практики за борба против сајбер криминалците.
