„Костал“ во Охрид достигна илјада вработени и станува клучна компонента на групацијата на глобалниот пазар

Германскиот концерн „Костал“ за производство на делови и компененти за автомобилската индустрија со свеченост што се одржа синоќа во хотелот „Инекс Олгица“, го одбележа ангажирањето на илјадитиот вработен во нивната филијала во Охрид.

Директорот на „Костал Македонија“, Виктор Мизо, истакна дека одлуката компанијата да отвори своја филијала во Македонија е плод на долготраен процес, чие преговарање траело повеќе од три години.

Охрид беше идентификуван како град со соодветна индустриска традиција, можности знаење и квалификација на вработени. Максимумот во плановите на „Костал“ во 2015-та година беше да стигнеме до 800 вработени. За помалку од пет години стасавме до илјада, и тоа вработени колеги не само од охридскиот и струшкиот регион туку од целата земја. Сметаме дека успехот е последица на она што како концепт го нуди компанијата – технолошко развиен, напреден процес, со висока технологија, автоматика, роботика, производи што се најсофистицирани не само во рамки на „Костал Групацијата“, туку и меѓу сите странски компании во Македонија моментално, рече Мизо.

Мизо смета дека дополнителните производствени капацитети што се планира да бидат отворени во регионот, за „Костал“ но и за средината генерално, ќе придонесат во формирањето кластер на технолошки напредни компании, а преку тие процеси регионот ќе се идентификува како место каде се повеќе луѓе ќе решааваат да работат, напредуваат и да ја пронајдат својата егзистенција.

Како Групација, тука во Охрид ја поседуваме најнапредната технологија. Процесите како енергетската електроника, електрониката, лиењето пластика и составувањето електронски елементи го имаме само тука во Охрид и уште во нашите капацитети во Кина, а не во Германија, САД, Ирска, Мексико, Индија, Британија…Сето тоа оди во прилог на перцепцијата дека тука во Македонија реално е остварлив планот да достигнеме обрт до над 400 милиони евра годишно, што е мошне значајно за земја како Македонија, рече Мизо.

Кристофер Сандерс од име на Групацијата Костал изрази јавна благодарност до генералниот директор и вработените во Костал Македонија, за исклучителниот успех на подружницата во Охрид.

Упатувам честитки за успехот на компанијата и на тимот кој тој го селектираше, кој совлада големи предизвици. Овој успех секако се должи и на сите вработени на кои им се заблагодарувам за придонесот кој го даваат во работата и остварувањето на зацртаните цели. – рече Сандерс.

Претседателот на Стопанската комора на Македонија Бранко Азески, во обраќањето на свеченоста истакна дека Костал е двигател на развојот во земјата.

Голем подвиг е во овие услови да се стигне до 1000 вработени. Убеден сум дека Костал ќе биде стожерната фирма на нашиот индустриски напредок, на соработката меѓу домашните и странските компании и ќе биде врвна компонента во економскиот развој на државата. – рече Азески.

Капацитетот за производство на „Костал“ во Македонија е лоциран во Охрид, како браунфилд инвестиција во кругот на поранешниот „ЕМО“ во селото Косел. „Костал“ е семејна фирма и познат снабдувач со напредни електронски технологии, електромеханички и мехатроничи производи за големи индустриски капацитети, со 38 производствени филијали во 17 земји.