Како член на извршниот комитет сакам да информирам дека апослутно не е вистина она што беше искажано на вчерашната, мизерна, прес конференција која ја одржа Марјан Додовски, со околу десеттина луѓе околу него, дека ВМРО- Народна партија згаснува. И најобичниот член знае дека една политичка партија може да престане да постои и дејствува само со одлука на највисокото тело- Централниот комитет. Продолжуваме со работа и понатака, сега со уште поголем елан, рече на денес одржаната прес конференција претседателот на општинската ВМРО- НП и член на извршниот комитет на партијата, Ванчо Костоски. Како што тој нагласи, изјавата од Додовски била само израз на додворување кон ВМРО- ДПМНЕ.


Костоски потенцира дека на синоќа одржаниот состанок на Извршниот комитет на партијата, била потврдена оставката на Додовски и рече дека на закажаната седница на Централниот комитет во недела, меѓу другото, ќе биде донесена одлуката за избор на Љубчо Георгиевски за ВД претседател, додека не се одржи конгресот на партијата кога Георгиевски ќе биде назначен за претседател на партијата. 

– Голема благодарност до Никола Груевски и дел од владата, затоа што со поткупувањето на Додовски ни направија голема услуга која седум години ја чекавме – враќањето на Љубчо Георгиевски за претседател на партијата, рече Костоски.

Обвинувањата за коалицирање со Бранко Црвенкоски, Костоски ги отфрли како невистинити и истакна дека единствена одлука за некаква коалиција која ја донел Извршниот комитет, а по барање на Љубчо Георгиевски била одлуката за оформување на третиот блок заедно со партиите Достоинство и Обединети за Македонија, која одлука не се реализирала поради Додовски.

Костоски уште днаш потенцира дека нема појава на масовно одливање на нивното членство во редовите на ВМРО- ДПМНЕ и рече дека станува збор за поединци.

OhridNews