Влатко Костов кој две години во низа беше прогласен за најдобар тренер во изборот на ФФМ го одржа првиот состанок со екипата на Работнички. Првиот помошник на селекторот Јонуз, Костов го истакна планот на подготовките на амбициозниот скопски клуб.
– Ми причинува огромна чест и задоволство што ќе застанам на чело на клуб каков што е Работнички. Поголемиот дел од подготовките ќе ги одржиме во Македонија. Глазурата на формата ќе биде на петнаесет дневниот престој во Анталија каде ќе се одиграат пет контролни средби – рече Костов. Целта на клубот е обезбедување на излез во Европа, со оглед на тоа што клубот беше елиминиран во националниот куп од Миравци, останува шансата да се бара преку првенството. По одиграните 18 рунди “романтичарите“ се на третото место со три бода помалку од лидерот Шкендија.
–Многу среќа и добредојде за новиот стручен штаб и фудбалерите кои пристапија. Јасни ни се намерите на клубот и ние ќе направиме се’ во наша можност да ја исполниме таа цел. – рече капитенот на тимот Никола Глигоров.
Костов на местото шеф на стручниот штаб на “романтичарите” доаѓа на местото на Зоран Стратев, кој во паузата на сезоната се раздели со клубот од Дебар Маало.
За него ова ќе биде прв клупски ангажман сезонава откако лани ја предводеше тетовска Ренова до историската прва титула во шампионатот.
Негов помошник во Работнички ќе биде селекторот на македонската репрезентација до 15 години, Горан Петрески – Чунга Лунга.
М.П.
