Репрезентативецот на Италија, Доменико Кришито, ќе го пропушти Европското првенство во Полска и Украина, поради истрагата која се води во оваа земја поради местење на натпревари.
Веста ја потврди и претставникот на Фудбалскиот сојуз на Италија, Деметрио Албертини, кој со репрезентацијата се наоѓа во спортскиот центар Коверчано крај Фиренца. Албертини изјави дека Кришито сака да ја расчисти целата ситуација и да ја тргне дамката од своето име.
Италијанската полиција во понеделникот наутро го посети кампот на репрезентацијата, обави информативен разговор со Кришито и изврши претрес во неговата соба. Кришито е член на рускиот шампион Зенит, а претходно играше за Џенова.
Под истрага на италијанските власти се наоѓа и тренерот на Јувентус, Антонио Конте.
Полицијата во понеделникот го уапси капитенот на Лацио, Стефано Маури, играчот на Џенова Омар Милането и уште 17 други лица, поради вмешаност во местење на натпревари во Серија А.
© Ohridnews.com. All rights reserved.
The content of this article, should not be printed, copied or published in any way, without permission by Ohridnews.com