Началникот на Комуналната инспекција, Танас Танасоски, изјави дека истрагата за еколошкиот инцидент што се случи вчера кога во водите на Охридското Езеро преку канализационата мрежа се излеа поголема количина нафта е во тек и дека се уште не се знае кој е предизвикувачот на загадувањето.
– На терен се екипи на Проаква, општинската комунална инспекција и Државниот инспектор за животна средина. Извршен е инспекциски надзор над сите хотели на кејот кај кои не е утврдено присуство на нафта, по што истрагата е проширена на целата територија на градот, каде ќе треба да бидат прегледани околу 6000 шахти од атмосферската канализација.- изјави Танасоски.
Тој посочи дека согласно законот, за загадување на заштитени подрачја сторителот може да заработи и казна затвор. Танасоски потсети дека сличен еколошки инцидент се случил пред 30 години кога поради хаварија во фабриката „Отекс“ дошло до излевање на мазут.
Јужниот ветер и брановите во текот на ноќта го исчистија езерото, а последиците од еколошкиот инцидент за кој сведочат масните дамки на плочникот од кејот и непријатната миризба допрва ќе се утврдуваат.
