СВР Охрид поднесе кривична пријава против 43-годишно лице од Охрид и против правен субјект со седиште во Охрид, поради постоење основи на сомнение за сторено кривично дело „повреда на правата од работен однос“. 
Пријавениот во својство на сопственик и управител во правниот субјект, свесно не се придржувал кон одредбите од Законот за засновање на работен однос и во правното лице, уредно не го пријавил и не извршил работничко осигурување на сега починатиот работник К.Љ. од Охрид, со што му ги одзел и ограничил правата што му припаѓале, информираат од СВР Охрид.
Управителот, посочуваат, дозволил пристап на сега веќе починатиот работник, на работно место кое е изложено на сериозни и специфични опасности, без притоа да добие посебни упатства за работа, односно дозволил да извршува работни задачи како помошник монтер, без притоа да изврши основна обука од областа на безбедност и здравје при работа и без соодветен здравствен преглед во здравствена ординација по медицина на трудот.
Во трагичен настан што се случи во зграда во изградба на 12 јануари, животот го загуби младиот охридски снимател, фотограф и продуцент Кристијан Љушев. Имаше 28 години.
OhridNews
