– Елиминацијата од ЕП би била голема катострофа за селекцијата и фудбалот во Холандија. Сите медиуми во Холандија ги критикуваат фудбалерите, кои поседуваат огромен квалитет, но на ова Европско не покажаа ни дел од тоа – истакна фудбалерот на Металург, Миле Крстев кој своевремено настапуваше во шампионатот во Холандија.


Вината за слабата престава на Холандија на ова ЕП, Крстев го гледа во одбраната која неможе да одговори на потребите на нападот. Во два натпревари Холандија прими три гола а постигна само еден, премалку за еден од главните фаворити за освојување на титулата.



– Голем проблем за “лалињата“ е одбраната која е лесно минлива. Тие секогаш играат со еден стопер кој знае да игра со топка, но во овој состав сега го немаат. Исто така бековската линија е слаба во одбраната и некреативна во нападот – рече Крстев.

Во “црвено жолтиот“ дрес Крстев има 22 настапи и постигнал два гола. На прашањето дали во иднина ја гледа Македонија на еден ваков голем собир, тој е оптимист, но треба макотрпна работа со македонските надежи.


– Во фудбалот се e можно, нам ни е потребен еден гол рез. Треба да се почне од младите категории, а резултатите ќе ги осетиме за десет години. Сега за сега не – потенцираше “везистот“ Крстев.

Еден од поискусните фудбалери во македонскиот шампионат Миле Крстев и на 33 години игра во добра форма за екипата на Металург. Тој и останатите фудбалери се спремаат за квалификациските мечеви што ги очекуваат во Лигата на Европа.

– Ќе играм фудбал додека ме служи здравјето. Дури се чувствувам спремен да одговорам на предизвикот и на тренерските барања од мене не размислувам за повлекување од фудбалот – заврши Крстев.

Мх.П.