Според првичните најави можно е нејзино зголемување и за 30%.
– Цената на лебот зависи од набавната цена на пченицата која е поголема за 30 проценти. Годинава се бележи недостаток на пченица, а при формирањето на цената секако мора да се земе во предвид и поскапувањето на струјата. Можеби зголемувањето на цената на лебот нема да биде 30 проценти туку 15 или 20, но сепак за тоа ќе треба да се одлучи на состанокот, вели претседателот на Мелничко- пекарското здружение, Љупчо Настоски.
Охриѓани ваквите најави ги коментират како уште еден удар врз семејниот буџет кој е се посиромашен.
– Ова беше и очекувано. Секогаш кога ќе дојде до поскапување на струјата тоа повлекува и покачување на цената и на многу други производи. Не знаеме како ќе ја поминеме зимата поради високите сметки за струја, а сега и лебот да поскапи. И до сега едвај стасуваа парите, а со поскапувањава уште потешко ќе се врзува крај со крај во месецот, велат дел од нив.
– Парно греење ставивме пред 5 години, но по се изгледа радијаторите ќе ги продадеме за старо железо, и ќе им се вратиме на дрвата и печките за огрев, ќе печиме леб самите. Ем сити, ем затоплени– додава друг сограѓанин.
Министерот за земјоделство, шумарство и водостопанство Љупчо Димовски, неодмна изјави дека доколку има потреба, Владата, преку обезбедување одредена количина македонска пченица од стоковните резерви, ќе интервенира за да се задоволат домашните потреби и да се спречи евентуално осцилирање на цената, а по тој основ и поскапувањето на лебот како финален производ.
Според него, во Македонија има доволно количина пченица по солидна цена која генерално, ги задоволува потребите на земјоделците и која воедно не би требало да влијае врз формирањето на цената на лебот.Сепак тој додава дека цената на пченицата е берзански производ, па доколку светските берзи бележат нејзино покачување, тоа секако ќе се одрази и во Македонија.
Министерот Димовски најави и евентуално укинување на владината мерка за условен увоз на странска пченица.
