Сите семејни, работни, егзистенцијални и емотивни проблеми охриѓани се почесто ги надминуваат  земајќи  антидепресиви. Лековите „Дијазепам“, „Хелекс“, и „Лексилиум“ во последно време ги има  во речиси сите домашни и лични залихи на лекови. Дека употребата на антидепресиви и лекарства за смирување, во последно време прераснува во навика, забележуваат и охридските фармацевти и матичните лекари.

Од охридските аптеки велат дека единствено ограничување и контрола при набавка на овие лекови е приложувањето на  лекарски рецепти, кои ги  издаваат матичните лекари или специјалистите.

 -Во последно време се повеќе пациенти доаѓаат да купат „Дијазепам“, „Лексилиум“ и „Хелекс“. Побарувачката на овие лекови никогаш не била мала, но во последно време не изненадува зачестеноста – велат фармацевтите од неколку  охридски  аптеки. Од таму нагалсуваат дека има и пациенти односно муштерии  кои порано купувале поретко вакви лекови, а сега купуваат многу често.

Како главна причина за земањето на антидепресиви, психолозите ги наведуваат влошената материјална состојба на граѓаните, страв од губењето на работното место, кредитна презадолженост и слични проблеми.

–Од овие причини се повеќе граѓани развиваат стрес и анксиозност и излезот од тоа го гледаат во лекарствата за смирување. Едни граѓани земаат лекарства за смирување за да ја редуцираат својата привремена напната психичка состојба, но дел од нив развиваат и посериозни депресивни симптоми, па стигнуваат и до болнички третман- велат  психолозите од Охрид.  Тие нагалсуваат дека неконтролираната употреба на антидепресиви е многу опасна, и предизвикува зависност, а она што посебно загрижува е фактот дека седативите ги користат сите старосни групи, а во последно време и помладите генарации.

Е.Е.