Возилото ќе биде наменето за потребите на здруженијата на лица со посебни потреби, кои ќе можат да го користат по претходна најава.
– Грижата за лица со попреченост е една од нашите приоритетни активности како локална самоуправа. Го прифативме стопанисувањето со возилото и неговото одржување и со тоа ја заокруживме комплетната реализација на овој проект. Сите здруженија ќе имаат можност да го користат возилото кое е значајна алатка за лицата со посебни потреби во однос на нивната социјализација во општеството и обавувањето на социјалните активности во што досега беа хендикепирани, изјави градоначалникот Бакрачески.
Хуманитарната акција ја иницираше претпријатието за собирање отпад „Отпад“ – Охрид во соработка со јавното комунално претпријатие, а се реализира со голема помош на Лајанс клубовите Лихнидос и Десарети, Ротари клубот од Охрид, локалната самоуправа, училиштата во општината, голем број помагатели и хумани граѓани.
– Се надевам дека оваа наша општествена одговорност ќе даде резултати и ќе поттикне и други граѓани, во иднина, да се вклучуваат во слични акции. Оваа акција ќе стане традиционална,ќе се одржи и оваа година и се надевам ќе стане нешто препознатливо за овој град, изјави Диел Аголи од Лајанс клубот Лихнидос.
Возилото претходно беше во сопственост на здружението „Зраци“, кое несебично одлучи да го донира за потребите и на останатите здруженија на лица со посебни потреби во Охрид.
-Од самиот почеток идејата беше возилото да им служи на граѓаните на Охрид и на сите лице со пречки во развојот. Користа е голема и не може да се опише со зборови.Самите лица, самите нивни семејства знаат колку беше оневозможено движењето досега и колку ќе биде полесно отсега натаму, рече Зоран Костадиноски, раководител на здружението „Зраци“.
Возилото марка „Мерцедес“ е опремено со специјална рампа и содржи потребен простор за превоз на опрема наменета за лица со посебни потреби.
