Тешки обвинувања и наврeди си разменија за кус период претставнците на најголемите политички партии и репрезенти на централната и локалната власт во Охрид во врска со изградбата на Свети Климентовиот универзитет на Плаошник. ВМРО ДПМНЕ ја обвини локалната самоуправа за недомаќинско работење и уцена кон државата, директно посочувајќи каде ќе завршат парите што инвеститорот на проектот „Плаошник 2014“ евентуално би и ги платил на општината за комуналии.

– Да кажете пред охридската јавност баравте ли од претставниците на Владата парите од комуналиите за изградбата на Свети Климентовиот универзитет со цесија да и бидат уплатени на охридска градежна фирма, запраша претседателот на ОК ВМРО ДПМНЕ, Атанаско Михаилов.


За локалната самоуправа нападите на нејзина адреса се обид  да се замолчи општината, која очекува објаснување од власта каде ќе завршат парите на охриѓани.

– Јавноста  сега  од ОК на ВМРО- ДПМНЕ очекува одговор дали е подобро овие средства да и се вратат  на Владата за изградба на споменици или да се вложат во комунални проекти во Охрид, велат од Локалната самоуправа.

Препукувањата помеѓу централната и локалната власт доаѓаат пред се поизвесното распишување на предвремени парламентарни избори, кои судејќи по реториката која уште сега се употребува, ќе бидат исклучително жестоки. Обвинувањата одат до таму што во јавноста се изнесуваат сериозни тврдења за милионски злоупотреби на народни пари и прекршување на законот, на што засега нема реакција од Јавното обвинителство.

OhridNews