Во драматичен и до крај неизвесен финиш претрпевме пораз од Русија со 72-68 во натпреварот за третото место. Натпреварот како и сите останати кои ги одигра Македонија влезе во тесна завршница, а спортската среќа по втор пат им се насмевна на руските кошаркари кои ја однесоа бронзата.
Македонците не се откажаа до самиот крај, 12-та величенствени се бореа за бронзата, но топката не не` посака и наместо мечот да замине во продолженија, Русија ја прослави победата.
Меч топката ја имаше Дамјан Стојаноски, кој беше одлично проигран од Бо Меккејлеб, но неискуството го направи своето, топката му се лизна од рацете на “близнакот“ и место во кошот заврши во рацете на руската одбрана.
Бо Меккејлеб со 22 поени беше најпрецизен на мечот, двоцифрени малото финале го завршија Илиевски 16 п. и Антиќ 13 поени.
Македонските херои пропуштија историска можност маратонскиот поход да го овековечат со бронза.
М.П.
