По извршените теренски наоди и истражувања и лабораториските анализи на собраните почвени профили, во моментов се работи на комплетирање на процесот на дигитализација на проектот „Македонски почвен информациски систем“.
Предвидените активности се очекува да завршат во определениот рок, до јуни 2015 година, информираа експертите од Факултетот за земјоделски науки и храна и Земјоделскиот институт, кои денеска остварија состанок со министерот за земјоделство, шумарство и водостопанство Михаил Цветков.
Проектот „Македонски почвен информациски систем“ ќе чини 340.000 долари и се спроведува со поддршка на Организацијата за храна и земјоделство на ОН (ФАО). Во реализацијата се вклучени и Македонската академија на науките и уметностите, Факултетот за шумарство, како и Природно-математичкиот факултет во координација со Министерството за земјоделство.
Системот ќе овозможи интеграција на почвите со други гранки во земјоделството и ќе биде основа за следење на промените како резултат на природен процес, интервенцијата на човекот и влијанието на климатските промени. На Министерството и на фармерите треба да им помогне во планирањето на видот и обемот на земјоделското производство, утврдувањето на погодните површини за засејување со одредени култури, одредувањето на ризикот од ерозија и суша, а ќе се користи и при развивање регионални планови за рурален развој.
-Изработката на почвената мапа и нејзината функционалност е од големо значење за градење стратегија во земјоделството со што ќе им се помогне и на земјоделците во заштитата и правилното искористување на почвениот потенцијал – истакна министерот Цветков.
Според него важно е да се напомене дека податоците од „Македонскиот почвен информациски систем“ ќе бидат јавни и достапни до сите заинтересирани институции и поединци преку интернет страницата на Министерството.
OhridNews
Извор:„МИА“
