Сојузот на синдикатите на Македонија -ССМ, денеска во Скопје организира голем протест. Како причини за организирањето на протестот ССМ ги наведе последните измени на Законот за работни односи, нефункционирањето на социјалниот дијалог, неутврдувањето на минимална плата, нискиот животен стандард и зголемувањето на цените на основните животни производи и недоследната примена на Законот за материјално обезбедување на невработените лица поради приватизација на претпријатијата со доминантна сопственост на државата во периодот од 2000 до 2004 година.
-ССМ бара по итна постапка донесување закон со кој ќе се укинат последните измени и дополнувања на Законот за работни односи и социјален дијалог, изјави неодамна Драган Цветаноски од општинскиот синдикат Охрид. ССМ бара дополнувања на Законот за пензиско и инвалидско осигурување, како и донесување на закон со кој материјално ќе се обезбедат сите стечајни работници прогласени за технолошки вишок согласно Законот за работни односи со над 25 години работен стаж. Исто така се бара со закон да се утврди и минимална плата, а услов за пензионирање покрај возраста да биде и работниот стаж, и да се преземат соодветни мерки за сузбивање на појавите на зголемување на цените на основните прехранбени продукти.
На протестот во Скопје денеска ќе учествуваат и голем број работници, членови на синдикатот и стечајни работници од Охрид, кои заедно со колегите од Дебар, Струга и Кичево на 7-ми ноември протестираа во Охрид. Денешните протести јавно ги подржа опозиционата СДСМ, што наиде на критика од владејачката ВМРО ДПМНЕ.
ohridnews
