Одлуката на Министерството за транспорт и врски на општинската градежна инпсекција во Струга времено да и бидат одземени надлежностите поради тоа што не постапила според законот во случајот со изградбата на џамија во Горна Белица, според локалната самоуправа е тенденциозна. Градоначалникот Рамиз Мерко тврди дека спорниот верски објект се гради легално и во согласност со Месната заедница. Тој презентираше договор склучен помеѓу Месната заедница и лице од Радолишта кое правото на градба подоцна  го отстапило на Исламската верска заедница, што според градоначалникот потврдува дека спрорната градба е легална.
-Во Горна Белица повеќе од 20 години се градат објекти, викенд куќички, цркви и друго, со договор кој сопствениците го склучуваат со претседателството на Месната заедница. И во овој случај е направен договор со Месната заедница на Горна Белица, во кој стои дека Месната заедница дава согласност за локација, местото и одобрение за градба, за што и наплатува. Тоа е една одлука на бившиот Извршен совет која се’ уште е на сила и според истата Месната заедница работи повеќе од две децении, изјави за OhridNews, градоначалникот Мерко.


Според Мерко одлуката на државните институции претставува директен атак врз општината, што може да има последици и врз меѓуетничките односи во Струга.

-Ние работиме на подобрување на  меѓукултурните и меѓуконфесионалните односи во овој мултиетнички град, но некој сака тука да создава тензии. Локалната самоуправа како до сега, така и во иднина ќе се придржува до законот и нема да дозволи ниеден објект нелегално да се гради и нема да дозволи изградба на објекти кои внесуваат раздор во меѓуетничките односи. Но, во Горна Белица во договор со Месната заедница се изградени преку 200 објекти меѓу кои и три цркви. И џамијата се гради легално со дозвола од Месната заедница и затоа рацете треба да се држат подалеку од Горна Белица.-вели Мерко.


Мерко вели  дека државата згрешила

Иако изградбата на џамијата во Горна Белица, наиде на отпор кај тамошните жители, кои изминатото лето излегоа и на протести,  градоначалникот Мерко тврди дека иницијативата  ја има поддршката од најголемиот дел на жителите на викенд населбата.

И покрај обидите не успеавме да добиеме официјално мислење од Месната заедница на Горна Белица, но во разговор со жители од селото бевме информирани дека тие и натаму остануваат на ставот дека изградбата на џамијата во викенд населбата е бесправна и треба да се стопира.

Г. Момироски