Место за излет: Скребатно

Скриено меѓу планини, долго време заборавено, па повторно откриено, селото Скребатно и неговата околина нуди природа и чист воздух. Оддалечено од Охрид 15-тина километри, а од Лескоец девет. Многу луѓе со потекло од ова до скоро напуштено село живеат во Лескоец (таму има дури и „Скребатска маала“) и во Охрид. Дел од нив се сложиле дека нивниот роден крај треба повторно да заживее, па си формирале одбор и секој со посебна задача успеале да направат простор за излет што плени. Има ѕидани скари, чешми, клупи од дрво, корпи за отпадоци, тоалети. Се` е средено и бесплатно. Единствен услов е да не оставате отпадоци зад себе. Идеално е за играње до изнемоштеност на децата кои дента кога бевме ние ги имаше барем 60-тина.

Инаку централна „фигура“ во широкиот убав простор е црквата „Св. Богородица“ изградена и оградена со камен. Неодамна е направена импресивна 15 метри висока камбанарија која доминира во погледот одозола, кога се приближувате кон селото по асфалтиран пат. Мештани и гости, посебно за време на големите христијански празници ја користат кујната и трпезаријата веднаш покрај црквата.

Во време на безработица и тежок живот во градот, ваквите иницијативи и нови алтернативи даваат надеж за развој на селскиот, излетничкиот па и верскиот туризам. Скребатно е место кое може да биде многу добра и интересна туристичка понуда.