Михаилов:Охрид ќе добие современ пазар, но од градоначалник од ВМРО- ДПМНЕ

СДСМ и Александар Петрески во 2005 ветија дека ќе изградат пазар, еден од најмодерните на Балканот и излажаа. Пазарот кој се наоѓа зад нас ниту е модерен, ниту е балкански. Напротив, претставува едно од најнесредените делови на Охрид, рече претседателот на општинската ВМРО- ДПМНЕ, Атанаско Михаилов,  на денешната прес конференција која се одржа на влезот на градскиот пазар.

– Во 2009 СДСМ и Петрески повторно ветија дека во Охрид ќе изградат модерен пазар и пак излажаа. Впрочем тоа е нивен стил на работење. Пазарот остана ист. Веројатно и во 2013 Петрески и СДСМ, повторно ќе ги излажат граѓаните на Охрид дека ќе изградат модерен пазар.Ветија и многу други работи и не ги остварија. Постојано бараат изговори дека ги кочеле од централната власт и за тоа лажат, изјави претседателот на ОК на ВМРО- ДПМНЕ.

Како што истакна Михаилов, иако општина Охрид не ги исполнувала условите за влез во втора фаза на децентрализација, централната власт му дозволила на Охрид да помине во истата и покрај блокираната сметка и повеќето од 15 милиони евра долгови на општината.

–    Сега ќе се повикуваат дека централната власт не им го одобрува Генералниот урбанистички план. Цел Охрид знае дека не е вистина, бидејќи СДСМ и Петрески нацртаа згради секаде каде што најдоја зелена површина, рече Михаилов.

Тој побара одговор на прашањето- каде се потрошени повеќе од 50 милиони евра пари на граѓаните, а при тоа не е изграден ниту еден капитален објект. Потенцира дека Охрид ќе добие современ пазар, но од страна на градоначалник и совет предводен од ВМРО- ДПМНЕ, партија која своите ветувања ги остварува.