Група од 11 ученици од проектната активност – драма при охридската гимназија „Св. Климент Охридски“ на 5-ти октомври ќе отпатуваа за Германија, каде до 14 октомври ќе учествуваат на Меѓународната театарска работилница „Der Anfgang vom ende“ што се одржува во организација на Форумот Wansee, во главниот град Берлин.
Учениците од Охрид заедно со нивните врсници на возраст од 16 до 20 години од Германија и од „Ухуру“ театарската група од полскиот град Грифино ќе имаат можност да ги презентираат своите вештини од актерството, танцот, уметничкото ораторство… Предвидено е во рамки на проектот младите актери од трите држави да следат интензивна настава поделена во три тематски целини, за потоа во мешани групи да осмислат свои уметнички перформанси што јавно ќе ги презентираат на завршувањето на курсот.
Покрај работните активности што ќе се одвиваат под менторство на познати професори, професионални актери и уметници од Германија, младите од трите земји ќе имаат и несекојдневна можност меѓусебно да се запознаат, да научат нешто повеќе за нивните врсници од другите земји, да разменат искуства, да учат и соработуваат меѓусебно и во групи, сето тоа преку дружење и забава.
Престојот во Германија предвидува и организирани екскурзии за запознавање на учениците со културно-историските знаменитости на Берлин.
Проектот се реализира со поддршка на Владата на Сојузна Република Германија, а активноста ја поддржа и охридската локална самоуправа целосно покривајќи ги трошоците за патувањето.
