Младите македонски едриличари до 14 години стекнаа драгоцено искуство на Светското првенство во едрење во класата Оптимист кое се одржа во Порторож, Словенија и собра над 280 млади натпреварувачи од 64 држави.
Македонија настапи со четири претставници, кои успешно ја завршија регатата, стекнувајќи вредно меѓународно искуство и спортска мотивација за натамошен развој.
Пласман на македонските натпреварувачи:
- Берак Шашко – 260. место
- Мила Булатовиќ – 262. место
- Стефан Бараковски – 270. место
- Лина Пашоска – 274. место
Во генералниот пласман по нации, Македонија го освои 52. место од 64 земји во Nations Cup рангирањето, кое се пресметува врз основа на настапите на најдобрите четворица натпреварувачи од секоја земја.
Првенството се одржа во услови со умерени ветрови, што бараше од натпреварувачите голема концентрација, техничка стабилност и тактичка прецизност. Се одржаа вкупно 9 трки, од кои 5 квалификациски и 4 финални.
Задоволни сме од дисциплината и посветеноста на нашите млади едриличари. Настапот во Порторож е чекор напред кон поголеми резултати и одржување континуитет на учествата на значајни меѓународни натправари. Продолжуваме со работа и инвестиции во младите категории, велат од Едриличарската федерација на Македонија.
Учество на вакви натпреварувања, додаваат, претставува вложување во иднината на македонското едрење, а поддршката од институциите и јавноста е клучна за понатамошен развој на овој спорт.
OhridNews
