На дрогата, како најголемо зло на денешницата, младите уште во текот на школувањето, мора со сигурност, недвосмисленост и енергичност да и се спротивстават. Секој се соочува со проблеми, но вистинската вредност е да успееш да се соочиш со проблемите без да се бега во свет кој кратко трае, зашто проблемите чекаат и при излегувањето од таа променета состојба- е еден од заклучоците од реализираните работилници за превенција од дрога, од страна на Младинскиот совет Охрид.
Учениците имаа можност да ја доближат сопствената визија низ нивните секојдневни примери, другарувањето како во училиштето, така и надвор од него. Од страна на едукатори – волонтери во Младински совет, беа презентирани видовите дроги и преку делење на едукативно-пропагандни материјали – флаери за дрога беа нагласени физичките и психичките последици кои ги предизвикува дрогата. Посебен акцент беше ставен на зависноста како една трајна состојба која го променува однесувањето на корисниците.
– Во групи, преку читање на вистинити приказни за лица кои ја користеле дрогата, се продлабочија нивните сознанија за постоењето на дрогите и последиците по здравјето на човекот. Беа извлечени поуки, дека дрогата убива и дека има многу начини преку кои е возможно таа да им се подметне, и тоа да ги одведе во неволја. Посебно им беше нагласено дека треба да бидат критични кон сето она што им се нуди и пред се да ги земат во предвид и другите аспекти на нештата. Низ отворената комуникација и соработката да изградат сопствен став и самостојност, велат од МСО.
Циклусот работилници се спроведоја во текот на месец март, како дел од програмата за ЗДРАВСТВО И ПРЕВЕНЦИЈА на МСО. Одржани беа во 8 основни училишта во општина Охрид и селата Лескоец, Пештани и Велгошти, а во нив учествуваа вкупно 440 ученици од седмо одделение. Целта на овие едукативни работилници беше да се испита критичкото мислење на учениците низ презентација и дискусија за дрогата и нејзиното штетно влијание.
