Младите од Охрид утре ќе садат Дрво на толеранција

Со цел да се одбележи Меѓународниот ден на толеранција, 16-ти ноември, во организација на Коалицијата на младински организации “Сега”, утре, младите од неколку градови ќе засадат садници на толеранција. – Со тоа ќе се остави белег, кој би потсетувал на важноста од меѓусебна човечка толеранција, велат од коалицијата “Сега”.

Утре, точно на пладне, во 12 часот, од страна на членови на Младинскиот совет,  во Охрид, “Дрво на толеранција” ќе биде засадено пред хотелот “Денариус”, покрај кејот на езерото.

Освен во Охрид, “Дрво на толеранција” ќе биде засадено и во Скопје, Прилеп, Струмица, Гостивар, Врапчиште и во Дебар. 

Активностите се во рамки на проектот на коалцијата “СЕГА” за Промовирање на меѓукултурниот дијалог помеѓу младите во Македонија, кој се реализира веќе две години.

Проектот е дел од годишната програма на Коалиција “СЕГА” за 2011 година, финансирана со програмата Civica  Mobilitas, имплементирана од CIR, а финансирана од SDC.

Целта на проектот е поттикнување на соживотот меѓу младите луѓе во Македонија за меѓусебна толеранција, соживот, без насилство, и за меѓусебно верско и национално почитување.