Локалниот клуб на млади при Социјал- демократската младина на Македонија, попладнето, во период од два часа на главниот влез од Градскиот Пазар, одржа акција на која на посебен штанд ги изложи производите кои во 2011 година имаат  значително повисоки цени споредено со цените од 2006 година.

Како што информираа од охридскиот клуб на СДММ, преку акцијата сакаат да го демонстрираат нивното незадоволство од новите цени и опаѓањето на животниот стандард.

– ВМРО- ДПМНЕ во изминатите 5 години од своето владеење го донесе сопствениот народ до питачки стап. Денес македонските граѓани во својата држава не можат да сврзат крај со крај. Секој трет граѓанин живее во сиромаштија. Со оваа акција сакавме да ги потсетиме граѓаните за колку се поскапени основните прехранбени производи без кои не може да се опстои, велат младите социјалдемократи.


Тие испратија порака до премиерот Груевски и до неговите соработници да слезат меѓу народот и да ги посетат ваквите штандови кои деновиве се организираат во сите градови низ земјава и самите да се уверат како народот преживува.

OhridNews