Голманот на ракометната репрезентација на Србија, Дарко Станиќ, поради повреда е неизвесен за настап на последниот натпревар во Ц групата, на кој Србија ќе игра против Словенија.
Србија, во четвртокот, забележа шокантен пораз од Полска 24:25, Полјаците победија со голот на Оржеховски постигнат во последната секунда од натпреварот.
Голманот на Металург, Станиќ, на тој натпревар беше најдобриот играч на Србија со 18 успешни интервенции.
„Цела ноќ не спиев поради болки во грбот. Се повредив за време на натпреварот со Полска. Тоа е стара повреда, но никогаш не сум се чувствувал толку лошо. Се обидуваме да најдеме некого кој ќе знае да го ‘намести’ пршленот, за да можам да бранам против Словенија“, изјави Станиќ за српските медиуми.
Натпреварот Србија-Словенија ќе се одигра во сабота со почеток во 20:15 часот. Во пресрет на последното коло Словенија има осум бодови, а Србија и Полска по шест, но Србија со евентуална победа од најмалку два гола ќе го освои првото место во Ц групата.
“макфакс“
