Претседателот на Синдикатот на работниците од управата, правосудните органи и здруженија на граѓани (УПОЗ) и поранешен лидер на ССМ, Ванчо Муратовски, го оцени за нелегитимен Конгресот на Сојузот на синдикатите на Македонија во Охрид на кој вчера за нов претседател беше избран единствениот предложен кандидат Живко Митрески.
Според Муратовски на Конгресот присуствувале половина од вкупно 135 делегати, поради што на собирот во Охрид не можело правосилно да се одлучува.
– Ова е невалиден конгрес и прашање е колкав е вистинскиот број на присутни делегати. Ова е првпат УПОЗ да не учествува и тоа е една од срамните белези на овој Конгрес. Веројатно во некои други времиња тоа ќе биде една од причините за поништување на Конгресот и одлуките што ќе се донесат, рече Муратовски.
Новоизбраниот претседател на ССМ, ги отфрли обвинувањата на УПОЗ, за кои рече дека се несериозни.
-Станува збор за личност која не може да се помири со она што значи апсолутна поддршка на синдикатите во РМ на кандидатурата, така што станува збор за индивидуални обиди и желботеки што не соодветствуваат на сериозноста на организацијата што ја претставуваме, истакна Живко Митрески.
