Реконструираната наколна населба во Градиште
Остварените резултати, велат одговорните, се најдобар одговор на бројните критики во јавноста дали изградбата на Музејот на вода била оправдана инвестиција или не.
-Музејот на вода секојдневно прима се повеќе луѓе. Минатата година од влезници биле остварени околу 1,6 милиони денари оваа година само за 7 месеци има 2,8 милиони денари. Овие бројки говорат дали била вносна и оправдана таа инвестиција или била залудна. Јас мислам дека таа е оправдана не само од туристички туку и од научен и културолошки аспект, изјави неодамна во разговор за OhridNews, Паско Кузман, директор на Управата за заштита на културното наследство.
Наколната населба во Градиште е реконструирана автентично на остатоците од праисториската неолитска населба во подводниот археолошки локалитет „Плоча – Миќов град“. На платформата која се издига во Заливот на коските изградени се 24 неолитски куќички во кои се изложени предмети пронајдени за време на 8-годишните археолошки истражувања на подводниот локалитет.
Наколната населба со патека е поврзана со Римската тврдина која се издига во месноста Кула кај Градиште.