Министерството за внатрешни работи информира дека не распишало потерница за бизнисменот Сеад Кочан, кому судот му одреди мерка притвор по жалбата на Специјалното јавно обвинителство. Осомничениот во случајот на СЈО „Труст“ го нема ниту во фото архивата на МВР за лица недостапни за органите на правдата. Од МВР таквата одлука ја објаснуваат со почитување на законот и прописите, бидејќи лицето не било обвинето, односно заради почитување на презумпцијата на невиност.
Во меѓувреме, вечерва, адвокатот на Кочан Никола Додевски побара од Кривичниот совет да донесе решение со кое ќе се стави вон сила Решението за одредување мерка притвор за неговиот клиент, бидејќи Основниот суд Скопје 1 и покрај поднесената ургенција на одбраната, не го доставил предметот за осомничениот на одлучување до Апелацискиот суд.
OhridNews
