По повод 30-от роденден на нашата музичка легенда, Тоше Проески, на 25 јануари во Спортскиот центар „Борис Трајковски“ ќе се одржи концерт „Со љубов од Тоше“.
Покрај негови пријатели и соработници ќе настапат деца од хорот „Златно славејче“ и членовите на музичкиот кабинет од Крушево кои премиерно ќе ја испеат композицијата „Пасворд“, на музика на Тоше, со стихови на Огнен Неделковски и аранжман на Валентино Скендеровски.– Концептот на концертот ќе биде поразличен од двата досега одржани меморијални концерти за македонската ѕвезда. Овој пат идејата ја дадоа фановите. Според нивна желба тие сакаат целата вечер да го носи „печатот“ на Тоше, да ги слушаат неговите песни, да го гледаат неговиот ведар и насмеан лик на видеоснимки, кои ќе се прикажуваат на три лед-екрани, и да ги пеат неговите песни заедно со пејачите кои ќе пеат на сцена, информира фондацијата.
На концертот ќе биде промовирано третото постхумно цеде „ Со љубов од Тоше “ кое ќе содржи 15 песни од кои 12 се од светската рок-антологија кои Тоше ги изведуваше на своите концерти, две песни се познати хитови, а досега неслушнати во негова интерпретација (едната е од Елтон Џон, а другата од Витни Хјустон), а 15-тата песна е „Наслони главу на моје раме“, која ќе биде промовирана на радијата непосредно пред концертот.
Концертот ќе се одржи со поддршка на ЕВН, „Аворд“ и Министерството за култура.
Ohridnews
